Bíll fór í sjóinn af bryggjunni við Árskógssandi

Bifreið með þremur innanborðs fór fram af bryggjunni á Árskógssandi í dag um kl. 17:30, en þá barst tilkynning til Lögreglunnar á Norðurlandi eystra.  Viðbragðsaðilar voru kallaðar út og hafa þeir aðstoðað lögreglu á vettvangi. Viðbragðsaðilar hafa náð öllum aðilum úr bifreiðinni og er verið að flytja þá á Sjúkrahús Akureyrar.
Þá var einnig óskað eftir aðstoð Landhelgisgæslunnar og viðbragðsaðila fyrir sunnan en búið var að ná aðilum úr bifreiðinni áður en til þess kom.
Ekki er grunur um að neitt saknæmt hafi átt sér stað. Nánari tildrög slyssins liggja ekki fyrir en rannsókn málsins heldur áfram og veitir Lögreglan ekki frekari upplýsingar að sinni.