Annað grænt skref hjá MTR

Menntaskólinn á Tröllaskaga hefur tekið annað skrefið í verkefninu Græn skref í ríkisrekstri og fengið það vottað og viðurkennt. Sorpflokkun hefur verið aukin og er ekki lengur hægt að henda nema flokka. Notkun pappírshandþurrka á salernum var hætt og í staðinn hefur komið blásturshandþurrkun eða handklæði. Aðeins er keyptur umhverfisvottaður pappír í MTR og sama gildir um vörur sem unnar eru úr pappír. Þá hefur skólinn sett sér stefnu sem hefur að markmiði að gera starfsemina umhverfisvænni, bæta starfsumhverfi og auka vellíðan.  Þetta kemur fram á vef mtr.is.

Markmið verkefnisins Græn skref í ríkisrekstri eru að efla vistvænan rekstur á kerfisbundinn hátt. Byggt er á grænum skrefum Reykjavíkurborgar, verkefni sem hófst haustið 2014.  Nokkrar stofnanir umhverfis- og auðlindaráðuneytis hafa tekið þátt í að aðlaga verkefnið að ríkisrekstri. Tilgangurinn er að hafa jákvæð áhrif á umhverfið, bæta ímynd og starfsumhverfi  stofnana og draga úr kostnaði.

Ljósmynd: Bjarni Grétar Magnússon / Héðinsfjörður.is