Anna Kristjana er Ungskáld Akureyrar 2018

Fyrr í dag var tilkynnt um úrslit í ritlistarsamkeppninni Ungskáld 2018 við hátíðlega athöfn á Amtsbókasafninu á Akureyri. Ungu fólki á aldrinum 16-25 ára á Eyþingssvæðinu gafst kostur á að senda inn texta í keppnina og hlutu þrjú bestu verkin peningarverðlaun.  Alls bárust 82 verk í keppnina sem er tvöfalt meira en í fyrra. Engar hömlur voru settar á hvers kyns textum væri skilað inn, hvorki varðandi efnistök né lengd. Þeir þurftu þó að vera á íslensku.

Niðurstaða dómnefndar, sem í sátu Hrönn Björgvinsdóttir bókavörður á Amtsbókasafninu, Kristín Árnadóttir fyrrverandi íslenskukennari við VMA og Þórarinn Torfason bókmenntafræðingur og kennari við Oddeyrarskóla, var eftirfarandi: Þriðja besta verkið var valið “Dagur á veginum” eftir Söndru Marín Kristínardóttur, í öðru sæti var “Tækifærin” eftir Önnu Kristjönu Helgadóttir og svo skemmtilega vildi til að ljóðið “Án titils” var valið í fyrsta sæti en það var einnig eftir Önnu Kristjönu.

Við upphaf athafnarinnar í dag fluttu systurnar Sólrún Svava og Sunneva Kjartansdætur lagið Schottis från Haverö eftir Duo Systrami og síðan las Tinna Sif söguna “Dagur á veginum” eftir systur sína Söndru Marín og Anna Kristjana las sín verk. Loks var boðið upp á kakó og smákökur.

Ungskáld er verkefni á Akureyri sem miðar að því að efla ritlist og skapandi hugsun hjá ungu fólki á aldrinum 16-25 ára.  Verkefnið er hið eina sinnar tegundar á landinu.

Í nefnd Ungskálda eru fulltrúar frá Akureyrarstofu, Verkmenntaskólanum á Akureyri, Menntaskólanum á Akureyri, Ungmennahúsinu í Rósenborg og Amtsbókasafninu.

Verkefnið er styrkt af Sóknaráætlun Norðurlands eystra og Akureyrarbæ.

 

Á myndinni eru frá vinstri: Kristín Árnadóttir, Hrönn Björgvinsdóttir, Tinna Sif Kristínardóttir, Anna Kristjana Helgadóttir og Þórarinn Torfason.

Aðsend fréttatilkynning.