Aðalgata 30 til sölu á lækkuðu verði

Veitinga- og samkomuhúsið við Aðalgötu 30 á Siglufirði hefur verið til sölu núna í nokkur ár, en ekki hefur enn tekist að finna kaupenda á þetta merka hús. Árið 2018 var það auglýst á 45 milljónir og einnig í upphaf ársins 2020. Núna er hinsvegar búið að lækka verðið í 39,5 milljónir í þeirri von að einhver geri tilboð. Þetta er stórt og mikið hús og synd að ekki skuli vera rekstur í öllu húsinu. Þetta húsnæði er kjörið fyrir 2-3 aðila að vera með mismunandi rekstur í húsinu, en það sem helst vinnur á móti þessu er hversu stórt húsnæðið er fyrir almennan rekstur sem hentar á Siglufirði.

Húsið er frá árinu 1924 og var veitinga- og sportbarinn Allinn verið starfræktur þar síðustu árin fyrir söluferlið. Áður var Nýja bíó í húsinu, en það var eitt elsta kvikmyndahús landsins. Fyrsta kvikmyndasýningin var 25. júlí árið 1924 og var þá húsfyllir, eða 355 manns. Húsið byggði Hinrik Thorarensen og rak hann Nýja bíó í áratugi og tóku synir hans við til ársins 1982, en þá keypti Steingrímur Kristinsson húsið og rekstur og rak til ársins 1992, en þá tók Valbjörn sonur hans við rekstrinum en árið 1999 var síðasta kvikmyndasýngin í húsinu. Eftir það hafa ýmsir aðilar átt húsið og reksturinn.

Húsið hefur í áranna rás hýst ýmis konar starfsemi. Þar hefur verið rekið kvikmyndahús, sælgætis- og íssala, dansleikjahald, skóverslun, fataverslun og lyfsala. Þarna var um tíma til húsa umboð Tóbaksverslunar ríkisins. Þarna hefur einnig verið reknir veitingastaðir, haldnar leiksýningar, troðið upp með tónleika og haldnir fundir.

Arion banki er núna þinglýstur eigandi hússins.  Húsið er rúmlega 700 fermetrar á tveimur hæðum.

Í vesturhluta hússins á jarðhæð er veitingasalur fyrir um 35 manns. Þar beint fyrir ofan er einnig veitingasalur með bar. Á efri hæð er einnig annar salur eða stórt herbergi auk salerna, starfsmannarýma og geymslna. Í næsta bili austan við veitingastaðinn var áður rekin sjoppa en er það pláss nýtt sem geymslur og lager í dag. Þar svo austan við er inngangur í samkomuhúsið sem áður var kvikmyndasalur. Fyrst er þar komið að fatahengi, ræstikompu og salernum og þar innaf er um að ræða rúmgóðan sal með mikilli lofthæð, sviði, bar og svölum sem samtals tekur um 150 manns. Undir sviðinu er léleg geymsla sem telur um 93 m² af heildarstærð hússins, og þar eru ummerki um raka. Í þessum hluta eru jafnframt salerni og fatahengi. Útgangur er úr salnum út í port til austurs. Eldhús er innaf veitingastaðnum á jarðhæðinni og lítill eldhúskrókur innaf sal efri hæðar.
Húsið virðist í nokkuð góðu ástandi frá götunni séð og er vel staðsett við torgið í miðbæ Siglufjarðar. Bakatil eru hins vegar áberandi múrskemmdir á húsinu og fyrirliggjandi framkvæmdir.