Akureyrarvöku aflýst

Akureyrarbær hefur ákveðið að aflýsa Akureyrarvöku að þessu sinni en hún var fyrirhuguð á afmæli bæjarins þann 29. ágúst næstkomandi. Er það gert til að sýna ábyrgð í verki, bregðast við tilmælum sóttvarnalæknis og þróun Covid-19 faraldursins í samfélaginu.

Þetta þýðir að allir stærri og minni viðburðir sem fyrirhugaðir voru falla niður. Það er Akureyrarstofa sem annast skipulag Akureyrarvöku og þar á bæ er unnið að því að minnast afmælis bæjarins með uppákomum sem taka fullt tillit til fjöldatakmarkana og fjarlægðarmarka. Stefnt er að því meðal annars að lýsa upp svæði og byggingar í bænum, gangandi og akandi bæjarbúum og gestum til yndisauka. Þannig verður Lystigarðurinn lýstur upp og skreyttur eins og undanfarin ár og áætlað að ljósin fái að lifa þar út septembermánuð.