Akureyrarvaka að hefjast

Akureyrarvaka, afmælishátíð Akureyrarbæjar fer fram dagana 25.-26. ágúst 2017, og eru fjölbreyttir viðburðir í boði. Formleg setning er að venju í rökkurró og rómantík í Lystigarðinum á föstudagskvöld og úr rómantíkinni verður haldið yfir í Hryllingsvökuna í Íþróttahöllina þar sem þemað er svart og ungt og efnilegt tónlistarfólk á Norðurlandi heldur uppi fjörinu.

Á Akureyrarvöku er einnig fjöldi  listsýninga, ein þeirra er  „Fólkið í bænum sem ég bý í“ en hún opnar á föstudagskvöld og þar er sjónum beint að átta áhugaverðum einstaklingnum, fjórum konum og fjórum körlum.

Á laugardag er upplagt að hefja daginn með stuttri fjölskyldusiglingu um Pollinn með Húna eða sjá heimildarmyndina Amma Dagbók Dísu sem sýnd verður á Öldrunarheimilinu Hlíð kl. 11:00 en aðalsöguhetjan er Hjördís Kristjánsdóttir íbúi á Hlíð.

Í Listagilinu verður líf og fjör með tónlist, mat, listsýningum og leiðsögn og listahópurinn RÖSK kemur sér fyrir með gjörninginn #fljúgandi. Á Ráðhústorgi verður skátagaman þar sem ungviðinu gefst kostur á búa til barmmerki, gera poppkorn yfir eldstæði o.fl. og í Landsbankanum verður leiðsögn um listaverkaeignina kl. 14-15  en þar má sjá fjölda verka efitr þekktustu listamenn þjóðarinnar. Í Kaktus verður mikið um að vera alla Akureyrarvöku, myndlist, tónlist, bíósýningar og fljúgandi matarboð. Í Rósenborg verður sérstaklega vel tekið á móti ungviðinu en þar verður Fjölskyldudagur Myndlistarfélagsins þar sem boðið verður upp á vinnustöðvar og verða leiðbeinendur á staðnum, einnig verða í Listasalnum Braga tvær ljósmyndasýningar á verkum Sigríðar Ellu Frímannsdóttur.

 

VÍSINDASETUR Í HOFI

Vísindasetur sem verður í Hofi verður fjölbreytt og fræðandi. Það verða m.a. sprengjusýningar, hitamyndavél, allskonar slímframleiðsla, froðutöfrar, spennandi fyrirlestrar, hljóðtaktar verða teygðir til og tvistaðir, kíkt verður undir malbikið á hin ýmsu rör, rafrásir settar saman og leyndarmál bergsins skoðað.

Í Samkomuhúsinu verður gamanóperan Piparjúnkan og þjófurinn sýnd, skáldið KÁINN verður til umfjöllunar í Háskólanum á Akureyri og ljóð og lög listakonunnar í Fjörunni verða sungin og flutt í Minjasafnskirkjunni.  Við togarabryggjuna verður Kaldbaki EA 1 gefið nafn við hátíðlega athöfn og kaffiveitingar á eftir í húsnæði Útgerðarfélagsins í boði Samherja.

 

STÓRTÓNLEIKAR Í LISTAGILINU

Það verða stórtónleikar í Listagilinu á laugardagskvöld sem hefjast kl. 21:00. Fram kemur hljómsveitin VAÐLAHEIÐIN sem sett er saman sérstaklega fyrir Akureyrarvöku en hana skipa Valur Freyr Halldórsson, Summi Hvanndal, Kristján Edelstein, Arnar Tryggvason og Valmar Valjaots og munu þessi flottu listamenn verða gestgjafar á sviði. Gestir stórtónleikanna verða þau Andrea Gylfadóttir, Pálmi Gunnarsson, KÁ-AKÁ, Valdimar og Jóhanna Guðrún og á lagalistanum eru lögin sem landsmenn þekkja svo vel og hafa sungið með í gegnum tíðina. Tónleikarnir verða sendir út á Rás 2.

 

FRIÐARVAKA Í KIRKJUTRÖPPUNUM

Friðarvakan í kirkjutröppunum er orðinn fastur liður í lok Akureyrarvöku en þá eru tröppurnar fylltar af friðarkertum sem Plastiðjan-Bjarg framleiðir sérstaklega fyrir þennan viðburð. Bæjarbúar og gestir eru hvattir til að taka þátt með því að kaupa kerti en það er Slysavarnadeildin á Akureyri sem sér um sölu á kertunum og verður safnað fyrir hjartastuðtækjum sem komið verður fyrir á fjölförnum stöðum í bænum. Kertin verða seld í Lystigarðinum við setningu Akureyrarvöku og allan laugardaginn í miðbænum.

Upplagt er að enda Akureyrarvöku á rómantískri siglingu kl. 23 með Húna um Pollinn. Með í för verða félagar úr Karlakór Akureyrar-Geysi sem flytja huggulega tónlist.