Þann 20. desember síðastliðinn brautskráðust 18 nemendur frá Menntaskólanum á Tröllaskaga við hátíðlega athöfn, eru það mun færri en undanfarnar annir. Hafa nú alls 550 nemendur brautskráðst frá skólanum frá því hann var stofnaður árið 2010. Mikill meirihluti nemenda skólans eru fjarnemar sem búsettir eru vítt og breitt um landið og nokkrir erlendis. Útskriftarnemarnir að þessu sinni koma frá tíu stöðum á landinu og tveir þeirra búa erlendis, sextán þeirra eru fjarnemar. Aðeins fjórir nemanna sáu sér fært að vera við athöfnina.

Jóna Vilhelmína Héðinsdóttir aðstoðarskólameistari stýrði athöfninni og sagði frá starfinu á önninni. Í máli hennar kom m.a. fram að 505 nemendur stunduðu nám við skólann á önninni, flestir á kjörnámsbraut og starfsmenn við skólann á önninni voru 27.

Lára Stefánsdóttir skólameistari MTR lagði í ávarpi sínu áherslu á að allir nemendur skólans skiptu starfsfólki skólans jafn miklu máli hvort sem þeir mættu í skólann til að stunda sitt nám eða væru fjarnemar.  Einnig sló hún á þá mýtu að fjarnám væri ekki alvöru nám, engum dytti í hug að tala um að fjarvinna væri ekki alvöru vinna, af hverju ætti fjarnám þá ekki að vera alvöru nám.

Við athöfnina fékk Dagný Kára Magnúsdóttir viðurkenningu frá skólanum fyrir góðan árangur í íslensku, spænsku og félagsgreinum og Elfa Rún Árnadóttir fyrir framúrskarandi árangur í listljósmyndun. Viðurkenningar frá skólanum voru listmunir eftir Aðalheiði Eysteinsdóttur.

Ávarp nýstúdents flutti Dagný Kára Magnúsdóttir og var það spilað af myndbandi þar sem Dagný gat ekki verið viðstödd. Hún lagði áherslu á hversu góða menntaskólareynslu hún hefði öðlast þrátt fyrir að hafa verið fjarnemi og aldrei komið inn fyrir skólans dyr; hún hafi hreinlega blómstrað í náminu. Hún hafi átt sérlega góð samskipti við umsjónarkennara sinn sem og aðra kennara skólans og náð að tengjast þeim vel og persónulega þó öll samskipti hafi farið fram í netinu.

Heimild og mynd: mtr.is.