13 á biðlista eftir bátanámskeiði á Siglufirði

Í byrjun nóvember mánaðar fór fram bátasmíðanámskeið í Gamla Slippnum á Siglufirði á vegum Síldarminjasafnsins. Allt kapp er lagt við að halda slík námskeið árlega, en sökum veirunnar sem herjað hefur á heimsbyggðina undanfarin misseri var orðið heldur langt frá síðasta námskeiði.

Aðsókn var góð, þátttakendur voru alls 8 og þar að auki voru 13 á biðlista. Hafliði Aðalsteinsson bátasmiður kenndi réttu handtökin við viðgerðir gamalla súðbyrðinga, en þátttakendur glímdu við lagfæringar á byrðingi Gunnhildar ÓF18 og skiptu um efsta umfarið í árabátnum Lóu frá árinu 1930, auk þess sem smíðaðar voru nýjar þóftur, kollharðar og bönd.

Bátasmíðanemarnir voru ýmist iðnnemar, starfandi iðnaðarmenn, bátaeigendur og áhugamenn um bátasmíði og viðhald gamalla báta.

Þetta kemur fram á heimasíðu Síldarminjasafnsins.