100 ára saga verkalýðsfélagsins Einingar-Iðju

Laugardaginn 10. febrúar 2018 kemur út bókin Til starfs og stórra sigra en hún hefur að geyma 100 ára sögu verkalýðsfélagsins Einingar-Iðju og forvera þess, en þau félög skipta tugum. Bókin verður um 400 blaðsíður að stærð í stóru broti, prýdd fjölda ljósmynda og margar þeirra hafa ekki birst áður opinberlega.  Jón Hjaltason sagnfræðingur hefur unnið að ritun bókarinnar undanfarin fjögur ár. Honum til halds og trausts er þriggja manna ritnefnd, skipuð þeim Braga V. Bergmann, frá Fremri almannatengslum, Sigrúnu Lárusdóttur, skrifstofustjóra Einingar-Iðju, og Þorsteini E. Arnórssyni, starfsmanni félagsins um áratuga skeið.

Samningur um prentun bókarinnar var undirritaður í síðustu viku. Bókin verður að öllu leyti unnin í heimabyggð, þ.e. umbrot, myndvinnsla o.fl. og Ásprent mun annast prentvinnslu, prentun, bókband og pökkun.

Útgáfuhátíð verður haldin í menningarhúsinu Hofi á Akureyri laugardaginn 10. febrúar 2018. Sá dagur varð fyrir valinu vegna þess að 10. febrúar 1963 var Verkalýðsfélagið Eining stofnað upp úr nokkrum félögum sem þar sameinuðust í eitt. Þar mun forseti Íslands, Guðni Th. Jóhannesson, veita fyrsta eintaki bókarinnar viðtöku.